天文台過氣台長「黑英」林超英，兩文三語頂呱呱之外，估唔到喺香港土生土長嘅佢，就連「潮語」都好掂。唔係講緊「屈機」、「升呢」等呢啲潮語，而係佢鄉下話—潮州話呀，佢仲叻到可以開班授徒，適逢浸大持續教育學院打算開潮語課程，佢前日特登幫手去分享吓啲好玩經驗。
話說好耐之前黑英陪爸爸去法國巴黎，識法文嘅佢帶住爸爸周圍玩，唔識路就用法文問當地人。點知林爸爸唔信佢法文了得，見親中國人就用潮州話問：「我哋咁行係咪真係啱？」黑英當時諗法國華僑邊識聽潮州話o架，點知十個有九個都識聽，仲識講添！佢好奇點解遠至法國都咁多潮州人，所以佢有次專登返鄉下睇吓，發覺原來潮州相對較窮，啲人喺鄉下搵唔到食，於是四散去其他國家，令佢對鄉下嘅認識同感情都增加咗，更加熱愛潮州文化。
黑英仲話學潮州話都有好多着數，就係對學其他外語好有幫助，例如潮州話冇F嘅發音，同日文、韓文以至西班牙文都好相近，學起嚟較易掌握，怪唔得黑英對自己的鄉下話咁自豪啦！