蟄伏咗大半年，到底搞緊乜？原來佢只係抖咗一陣啫，跟住佢攞咗張卡片出嚟，上面寫住佢做咗城大校長辦公室高級顧問。咁咪即係校長郭位嘅軍師囉！乜城大要打仗咩？

係呀！相信係一場硬仗添！何解？何醫生話啱啱幫城大遞咗一份申辦獸醫學院嘅計劃書畀大學撥款委員會，申請同世界排名首位嘅美國康奈爾大學合辦全港首個獸醫學士課程。

何醫生話呢個學院唔係醫啲小貓、小狗，亦唔係做護理課程，而係研究公共衞生同食品安全，尤其香港經歷過○三年沙士嘅慘痛經驗，世衞亦話過超過七成嘅病菌都係嚟自動物嘅，仲曾經高調咁呼籲過各國要盡早呢啲研究，所以香港亦都應該有呢類嘅研究，依家佢就係負責主持城大籌辦獸醫學院工作小組嘞。

講明唔做院長

查實郭校長喺年初已表露心迹話想搞獸醫學院，點知畀教資會冷待，佢仲反過嚟叫教資會要有長遠目光添！雖然郭校長畀教資會大盆冷水照頭淋，但淋唔熄佢心裏嗰團火，睇嚟團火仲愈燒愈旺添！

郭校長呢次搵何醫生幫拖做軍師，擺明係想借助何醫生嘅豐富經驗，話晒佢做過醫管局嘅CEO，了解醫療機構嘅運作同管理，而佢亦同沙士打過一場硬仗，甚至曾經感染過沙士添，搞公共衞生簡直係身經百戰，呢次肯幫拖，好明顯係要幫城大開路兼掃清啲障礙，最終令獸醫學院可以落實。

若果搞得成都係幾年後嘅事，到時佢會唔會做學院院長㗎？佢笑笑口話自己唔係讀獸醫出身，就算有獸醫學院都唔會做院長。