小白觀點：唔袋幾皮嘢咪出街

明愛醫院真係好得，前線人員個個訓練有素，任由病人死喺醫院門口有之，出示唔到身份證要撲水至有得醫又有之，真係愈嚟愈有內地醫院Feel呀，唉，都有名你叫「明愛」，就係擺「明」冇「愛」嘅簡稱，咁都唔醒水，係咪自己攞嚟吖。

不過又難怪嘅，成班醫管局高層個個幾百萬年薪，節流不得，梗係要喺病人身上開源啦。北望神州，連大名鼎鼎嘅廣州呼吸疾病研究所所長鍾南山都話喎，佢嘅家人去睇醫生，都要請教佢要做幾多公價人情。所以各位最好有定心理準備，以後身份證可以唔拎，日日記得袋定幾皮嘢至出街呀，仲要放定喺當眼位置，因為一個大吉利是有乜事，醫管局認錢唔認人。

網友觀點...X）...

[　匿　名　]

可能最「明愛」係啲護士喎，識得半夜三更叫啲病人家屬起身屙夜尿呀！

[　匿　名　]

要怪就怪政府啦，醫管局對前線人員啲條例，三日都睇唔完，根本醫管局都唔係想救人，想玩人就真。

[　怪醫秦博士　]

佢哋梗係先收錢後救人啦，佢唔怕你走數呀！

[　CHE　]

佢哋想為病人好啫，因為依家入公立醫院，隨時因為醫療失誤，有入冇出o架。

網址：www.sunsiupak.blogspot.com

阿豪觀點：不如鎖病人防走數

公立醫院又發生見錢才救人嘅醜聞。明愛醫院接收七歲小童，因為佢未能出示身份證，而堅持收取非本地人嘅七百元，結果男童父親拎番身份證才肯救人，但已延誤咗四小時醫治時機。

明愛醫院繼見死不救後又爆出見錢救眼醜聞，真係離晒大譜，七百蚊其實唔係一個大數目啫，點解明愛搞到好似等住嚟開飯咁呢？

其實明愛醫院嘅前線員工真係好唔識變通，依家都係無非驚病人走數啫，可以學吓內地啲同行咁，唔理三七廿一醫咗先，最多都係醫好咗之後，用手銬將病人鎖喺病床上，唔畀佢哋走啫。又或者咁啦，搵幾個男警員守病房，女病人全部唔敢嚟，可為醫院減低一半負擔。

網友觀點...X）...

[　卜　勤　]

小朋友無錢差點開唔到眼，又差點有錢都開唔到眼。小朋友，去貧困山區搵奧比斯，快過搵明愛。

[　井澤廣美　]

呢件事係典型死跟指引、僵化處事造成，因為斷估明愛醫院唔會等住呢七百蚊開飯啩？

[　Jam紙兒　]

吓吓死跟指引做嘢，請個機械人返嚟冇咁嬲！

[　匿　名　]

鑊鑊出事都搵前線祭旗，畀你都死跟指引啦！

網址：www.lukchiho.blogspot.com

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另通知，敬請留意。