呢嗱，本報尋日喺街頭訪問咗部分市民，只有個別人知道東亞運十二月五日揭幕，至於東亞運兩個吉祥物「東仔」同「亞妹」個名，亦只有少數人講得啱。有的士司機投訴話，依家都未知各比賽場館嘅地點、比賽時間同交通管制措施，到時唔知點樣接載乘客去睇比賽。民政事務局補鑊，聲稱會加強宣傳力度，等市民對東亞運有更深認識，咁即係承認宣傳工夫做得差啦。

掟個銀仔落水都有「揼」一聲聽吓，東亞運總經費大拿拿十三億，居然悄無聲息，宣傳差成咁，呢筆錢認真使得冤枉咯。不過咁，好事不出門，壞事傳千里，有關東亞運嘅好消息唔多，但蝦碌醜聞絕對唔少。

唔係講笑，東亞運仲未開幕，香港已經攞咗個「第一」嘞。大型運動會當然唔少得主場館，好似北京奧運個「鳥巢」咁，夠晒睇頭，係人都記得。呢次東亞運使咗四個億興建嘅將軍澳主場館，居然細到無倫，加埋臨時座位只能勉強容納五千人，連開幕式、閉幕式都冇辦法搞，直頭攞硬「最袖珍主場館」金牌啦。

主場館袖珍都不特止，仲係問題多多嘅豆腐渣工程。一場賽事都未舉辦過，條跑道已經好似生瘌痢咁凹凸不平，周圍都係水氹，失禮死人。當局尋日解釋話，跑道喺春天鋪設，出問題係因為潮濕所致喎。叮，香港又唔係今年春天至係咁潮濕，唔好賴得就賴喇！

其他蝦碌嘢更加係十隻手指都數唔晒，簡直「再創香港傳奇」。早排當局想藉全港運動會測試一下東亞運舉辦能力，西區公園體育館竟然穿晒窿，形成外面落大雨、裏面落細雨嘅奇景，要出動膠桶陣對付。仲有吖，之前進行火炬傳遞，幾乎搞出將火炬傳入電視台嘅大笑話。正如立法會議員王國興話齋，當局宣傳工作起步太遲，比賽場館又問題不斷，令市民對港府辦好東亞運嘅信心降低。

叮！東亞運準備工夫唔湯唔水，完全係因為港府好大喜功，一味諗住將體壇盛事變成為自己攞彩嘅政績工程，根本冇畀心機規劃，做嘢求求其其，是是但但。據講有啲測試賽居然要拖到賽前唔夠一個月至可以進行，到時有乜冬瓜豆腐，香港嘅國際聲譽睇怕連渣都冇。

早排有立法會議員要求舊年負責京奧馬術賽嘅政務司司長唐英年，介入督促統籌東亞運，點知佢到依家仲滋油淡定條條Fing。唐唐前日喺中文大學做演講騷，大談特談「包容」，話呢啲係「領袖藝術」。廢噏無謂，依家東亞運搞成咁，再唔快快趣趣做啲實際嘢補鑊，到時買咗飛嘅市民要求回水，係咪你「包容」先？叮！