小白觀點

唯一避過海嘯的港人

深水埗山邊有個隱世阿伯，據聞力大無窮，大大碌電燈柱都可以托去賣。呢個當然啦，佢平日食野果飲溪水，冇受到蘇丹紅、三聚氰胺毒害，個草廬又冇釋放致癌甲醛，梗係身壯力健啦。

唔係講笑，呢個阿伯可能係全港唯一可以避過金融海嘯嘅人。呢嗱，美國都有個麻甩佬喺山洞隱居三年，肚仔餓就捉隻松鼠或浣熊燜嚟食，悶悶哋就去公共圖書館上網，金融海嘯搞到全世界天翻地覆都同佢唔相干。

小白老弟奉勸一句，隱世阿伯都係唔好成日拎碌電燈柱周街行喇，雖然型到爆，仲會搞到好多師奶流晒口水，但係因住警察睇到以為你拎住大殺傷力武器，隨時開槍呀。

網址：www.sunsiupak.blogspot.com

網友觀點......

SiU風

啲政府官咁得閒就應該請教吓佢啦，唔好日日坐喺冷氣房「印印腳」，企喺台上面就亂咁噏。

少林子

真係奇人，佢靠食野菜生果飲山澗水維生，仲力大無窮，高人！佢識唔識功夫或輕功呢？

深山太保

勁！成個武林高手咁，連佢個仔都請唔到佢出關，仲被打到變豬頭，你話勁唔勁。

恆志

你睇呢啲隱蔽長者咪香港政府造成㗎囉，老人家晚年情願唔靠政府、唔靠仔女，入深山。

客迭

喺鬧市有鏹水彈，一陣又畀亡命小巴撞，可能真係喺深山安全啲喎……

匿名

《蠟筆小新》咁好睇，如果作者咁就失蹤會好可惜……

Patrick Lai

你估匿入深山就實安全咩，一陣好似尼泊爾「野人」咁，遇着個槍法奇準嘅差大哥，你話點算？

豬sue

深山，一個看似浪漫的所在，其實危機四伏，因為你隨時遇到手機訊號盲點，想報警都報唔到。

阿豪觀點

練功要識揀地方

呢排「深山」似乎特別多新聞，好似《蠟筆小新》作者臼井儀人咁，入咗深山之後到依家都未見人，惟有希望佢真係同「pat pat外星人」一齊玩啦。臼井係咪同外星人一齊玩咁神奇就唔知，但係香港土產嘅深山大野人就肯定神力無窮，事關有街坊曾見過佢獨力抬起碌倒塌咗嘅電燈柱去變賣。

不過大家千祈咪學呢位伯伯，以為吸收天地靈氣就可練得一身好武功。大家都知啦，香港好多熱門行山地點都冇手機網絡覆蓋，有啲地方甚至連九九九都打唔出，入到去名副其實與世隔絕。除非你入到深山之後練成埋特異功能，可以用腦電波隔空同其他人溝通啦，否則睇怕未得道已經升仙矣！

網址：www.lukchiho.blogspot.com