嚟緊二十二號係世界無車日，環境局局長邱騰華尋日預報當日會身體力行響應活動，擺低佢架局長座駕，改搭公共交通工具返工。佢仲話，會要求環境局成班同事齊齊響應。一眾問責副局長為免被抽秤，都紛紛表示當日會放棄揸車，齊齊搭公共交通工具返工。睇嚟，禮拜二嗰日，市民好容易見到啲問責官員扮平民，同你一齊追巴士、追港鐵噃！
環境局副局長潘潔亦老早表明會緊隨局長做騷：「仲使問嘅，我老闆（局長邱騰華）一馬當先響應，我梗係要響應啦！」喺新界住嘅潘潔坦言，當日要搭小巴再接駁港鐵，相信要花個幾鐘頭至返到政府總部，但係為咗環保冇計啦！
至於住喺北角嘅運輸及房屋局副局長邱誠武，就話副局長冇固定座駕，所以都慣咗坐港鐵去中環返工。
家在港島區嘅民政事務局副局長許曉暉都支持無車日，佢話當日會提早出門口搭港鐵返工，仲會改着平底鞋等對腳行得舒服啲。許曉暉話，佢屋企早已推行「環保政策」，包括盡量少開冷氣，就算開都調校至二十五度室溫；而廚房嘅垃圾袋就會分開裝乾垃圾同濕垃圾，話咁樣可以節省膠袋喎。
不過，雖然有咁多問責官員喺無車日響應環保，邱騰華都好老實咁話，響應無車日係「意義大過實際作用」。咁講即係擺明做騷？