20/09/2009

播放本新聞相關短片

政情:梁卓偉京官前做指揮

醫學界尋日搞咗場晚宴,國家衞生部部長陳竺都係嘉賓之一,晚宴之後,由醫學界人士組成嘅合唱團同管弦樂團有一場表演,重頭戲係食物及衞生局副局長梁卓偉擔綱指揮,合演一曲《歌唱祖國》畀大家睇。

一眾嘉賓尋日五點幾到場,身為指揮嘅梁卓偉已經一早到埗,喺綵排期間,佢對每一個細節都非常着緊,不時穿梭於合唱團同管弦樂團之間,又提醒合唱團由於現場太過吸聲,會出現大約十分之一秒嘅回音,絕唔能夠唱得太過快。

到正式表演時先由管弦樂團演奏樂曲《黃河頌》,再由合唱團唱出《歌唱祖國》,演奏總算順利進行,作為指揮嘅梁卓偉表現揮灑自如,總算鬆一口氣啦!佢自細同音樂結緣,家吓都係兒童合唱團嘅義務副指揮,今次同醫療界人士一齊表演,睇怕第日佢又多個舞台囉。