政府最近建議大幅調高刑事法援律師費七成至一倍，但香港律師會仍狠批政府嘅資助太少，仲反枱發起集體杯葛接辦刑事法援案件一個月嘅活動。現任律師會會長王桂壎日前喺一個酒會上更勞氣咁話，佢哋並非㩒住搶，以區域法院案件為例，即使由依家嘅每粒鐘三百蚊增加逾倍至六百二十蚊都唔係高，幾乎連水喉匠都不如。
佢話，早幾日屋企爆水喉，求其call個水喉匠上嚟修理，都話要收六百蚊一粒鐘，冇理由啲律師讀咁多書學咁多嘢，收費都唔及一名水喉匠喎。該會兩名前會長黃嘉純同周永健亦異口同聲力撐今次杯葛行動。
黃嘉純強調佢哋早喺九二年已向政府提出有關問題，傾咗成十幾年到依家先有回應，將今次建議加幅扣番咁多年嚟嘅通脹率，其實即係冇加過。周永健則話自己都接過唔少法援案件，雖然民事案收費高過刑事少少，但同私人市場仍然差好遠，扣埋啲燈油火蠟同機會成本，其實同做義工冇乜分別。但係今次調整後，政府外判刑事法援開支將會由過往嘅九千萬元倍增至一億九千萬元，納稅人負擔都重咗好多喎！