同齡同心慶鑽禧慈善籌款晚宴尋晚喺君悅酒店舉行，一眾六十歲嘅前官場及名人圈成員爭相捧場，包括前財爺梁錦松、兩代民政事務話事人「藍爺」藍鴻震同林煥光都有捧場，仲有久違嘅前駐京辦主任梁寶榮偕太太一齊到場。
冇見寶官咁耐，原來佢已經四代同堂，兩年前榮升外公。雖然做咗阿公，但寶官唔認老，話依家幫緊新世界中國地產做地區主管，負責天津項目。早排梁展文過檔新世界單嘢搞出軒然大波，寶官就申報自己○八年入職嗰陣已經做足晒手續，即係免是非上身囉。
尋晚嘅晚宴以七十年代為主題，「媽打」李麗娟整咗個七十年代奧米茄髮型，莎莎老闆郭少明就整咗個「阿飛正傳」Look，「小吉」方黃吉雯就揀咗件綠色通花旗袍再襯個古董手袋，盡顯優雅。