寧願唔做短視生意

今年上半年，「磚頭」價格猛升，好多市民都話跌晒眼鏡，有啲捱過負資產噩夢嘅人更加心驚驚。金管局總裁任志剛近期一再警告如果資產出現泡沫會好麻煩後，副總裁蔡耀君上個禮拜更寫信「點醒」銀行界，話明關注本港銀行批出按揭時利息太低嘅現象，仲話如果銀行將按息定得太低，會喺聲譽、利率同流動資金上產生風險。

金管局出招後，地產股率先回落後，梁太尋日有意收細樓市泡沫，佢話金管局向銀行發出樓按息率指引係好事，該行亦支持有關指引。事實上目前銀行樓按息率過低，個別銀行更低至只有二厘（以P減3.25厘計），呢類惡性競爭會令部分銀行無利可圖，對業界絕無好處。佢雖然冇話恒生會加按息，但就肯定會視乎市場情況研究新指引。

不過，梁太明撐金管局，勢對本港樓市帶嚟微妙影響，佢開腔顯示銀行閂細水喉機會好大，此舉等於喺㷫合合嘅樓市中放咗塊冰，肯定有助降溫，但銀行或會因為咁做少咗按揭生意，梁太寧願撐金管局、都唔想做短視生意，目的都係避免樓市泡沫過大，積重難返。睇嚟，呢個恒生一姐嘅作風都係跟足傳統，最緊要穩陣！