縱橫官場三十年嘅余志穩，雖然官運麻麻，臨走連D6都升唔到，而且在任期間社署亦出過唔少蝦碌嘢，但市民對佢嘅印象似乎唔係太差，近日甚至有唔少社福界團體紛紛為佢送別餞行添。

人之將走，其言也善。余志穩尋日透過電台節目「明志」，話為官之道要多聽市民意見，了解市民感受，仲強調退休後唔會加入商界，尤其係地產界，因為以往接觸過唔少地產商，以免惹嚟瓜田李下嘅嫌疑，只希望可以做義工、做學術研究同教學。

話退就全身「裸退」，發揮餘熱回饋社會，唔計報酬做義工幫助弱勢社群，咁嘅官員已經買少見少，甚至可以話鳳毛麟角咯。嗱，其他高官不妨學吓嘢，唔好見錢眼開，成日掛住搵真銀至得(口架)！

話時話，香港政府標榜高薪養廉，納稅人對公僕都算畀到足啦。佢哋嘅人工世界一流，咪話特首吖，連問責局長份糧都比美國總統高咗成截，而且除咗有優厚退休金之外，仲可以食長糧，退休之後生活無憂無慮，做吓義工，幫吓有需要嘅人，都好應該啫。

叮！至弊好多高官貪得無厭，退而不休，攞完退休金即急不及待去私人機構搵真銀。好似前房屋及規劃地政局常任秘書長梁展文咁，在職期間負責處理地產範疇工作，退休後管制期未過，就受聘同地產業務有關嘅私人財團，仲出任高職添。

仲有前房屋署副署長鍾麗幗，做高官嗰陣處理過西九事宜，退休後即刻出任私人公司高層，好明顯涉及利益衝突啦。離職高官唔避嫌已經夠離譜，政府對可能涉及嘅利益衝突居然毫無警覺，罔顧市民嘅感受，對相關申請照批可也，如果話咁都唔係官官相衞，細路仔都唔信喇。

梁展文事件引起市民極大反感，政府有見民怨沸騰，焗住整個「首長級公務員離職就業檢討委員會」補鑊，搞咗一大輪，開咗N次會，提出咗二十三項建議，其實不過係新瓶裝舊酒，掩人耳目。

委員會建議延長部分首長級公務員嘅再就業管制期，表面上收緊咗，其實只係敷衍市民，因為負責審批嘅諮詢委員會不過係橡皮圖章，對有關申請幾乎從冇托手（月爭）。更荒謬嘅係，委員會仲建議撤銷離職公僕喺指定補助機構擔任全職受薪工作嗰陣停發長俸嘅安排，等於畀佢哋享受雙重福利。

叮佢個鎯鎯！高薪養廉變咗「高薪養貪」，養埋班食極都唔夠嘅官僚，納稅人被迫做老襯，真係冤哉枉也！