孫中山曾經旅居香港多年，但本港籌辦孫中山紀念館時，好多文物都要向外收購，康樂及文化事務署日前爆出遺失二十一項孫中山文物嘅醜聞後，好多珍惜歷史嘅市民都感心痛，民政事務局局長曾德成尋日出席一個場合時卻輕輕帶過，話件事發生喺多年前，佢哋會總結經驗。呢番話最重要嘅一點係呢件事喺好多年前發生，即係同佢冇乜關係，所以唔好搵佢問責。
德成局長尋日出席「少年太空人體驗營」出發儀式，話康文署內部已就此進行認真調查，依家重要嘅係總結經驗，改進工作，會繼續完善博物館管理制度同文化等。
佢嘅答案好行貨，都係想人哋向前看，唔好追究。民政局家吓已經被人質疑廢廢哋，博物館、文康管理又一再出事，德成局長真係唔可以次次都向前看噃。