康文署唔見咗二十一件孫中山文物，居然當冇事發生，聽講呢批失物中，有孫中山女婿嘅手槍添，如果有日有人畀呢支失槍射親，係咪應該入孫中山數呢？後果可大可小。民政事務局話冇證據顯示喺運送同儲存過程中唔見咗，咁到底呢批文物去咗邊呢？

呢單嘢的確係有啲蹺蹊，小白老弟最講求科學，唔相信康文署署長周達明會用到「五鬼運財」呢啲邪門外道，況且要運走二十一件，至少要請一百零五隻鬼仔，相當勞師動眾吓。最有機會嘅，就係康文署入面有個百慕達三角地帶，所以咁多部門夾埋作古仔呃細路。

當局為免人心惶惶，Well、Well、Well，好應該開個X-File，由唐唐做神秘調查大隊長，唔係搵出失物原因，而係要揪出爆料內鬼。

冒　名

之前去過呢個博物館啦，乜都冇，好鬼流，仲要收錢，原來唔係冇展品，一啲收收埋埋唔出，一啲直頭唔見埋，唔怪之得啦，回水呀！

賢　仔

呢批文物實搵唔番㗎喇，政府嘅嘢一個推一個，總之就唔好上身，保育嘥氣啦。

佩　霞

政府對文物保育都唔緊，欠專業，咁就唔好扮嘢要拎番嚟啦！

小　雲

康文署今次真係大鑊，冇咁大個頭唔好戴咁大頂帽啦，畀人哋笑死喇，仲誇口紐倫港。

阿　喬

康文署藉詞時間緊迫，無法逐件數，又話已書面警告有關人員，一年內冇職升。原來一年內冇職升已經係大懲罰，唔怪得咁多人去爭政府工啦，人工高，永冇孭鑊。

黑　仔

唔見文物都可能係好事，落喺識寶之人手上都好過畀康文署啲廢官「保育」吖，遲啲咪又係整爛。

蓋世太保

九成九係畀人搵笨，啞仔食黃連。

愛輪波

我估康文署又畀人昆，試吓將呢堆貨拎去蘇富比拍賣吖，可能值三兩萬㗎咋！

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另通知，敬請留意。

網址：

www.sunsiupak.blogspot.com