席捲全球嘅金融海嘯蒸發咗好多財富,本港方面,富豪因為沾手Accumulator(累計股價期權)出事嘅亦有好多,香港「造紙大王」李運強都不諱言,佢本人因為炒燶Accumulator勁蝕八億至十億元,創辦嘅理文造紙股價更一度急跌九成半。經歷海嘯洗禮後,佢同公司嘅財政重傷近日都逐漸康復,佢坦言,呢個「血的教訓」永遠都唔會忘記!
李運強前日出席仁濟醫院籌款晚會時,講起海嘯教訓,佢慨嘆自己做生意幾十年,遇上逆境上落幾千萬可謂司空見慣,但一次過蝕億億聲都係第一次,今次稱得上係「血的教訓」,自己永遠都唔會忘記!不過,佢都強調,困境中積極轉型係秘訣,最近生意好番好多,相信最困難嘅時刻已經過去,公司股價近來亦重上番十二蚊嘅水平,令一眾小股東唔使咁傷,佢個心先至安樂番啲!