昂坪三碌拎換帥，原港鐵高層李殷泰接張少華班，上個月二十號已經履新。張少華臨走不忘向下手李殷泰面授機宜，其中一招當然係同鄰居打好關係啦，唔知係咪因為咁，李殷泰一上任就拜「地主公」，返工冇耐就去寶蓮寺拜會住持釋智慧。鄰居咁畀面，釋智慧梗識做，除帶李殷泰遊寶蓮寺，又請佢食齋。
三碌拎同寶蓮寺係對歡喜冤家，李殷泰櫈都未坐暖，就第一時間過去寶蓮寺，係希望保持睦鄰關係。釋智慧見佢咁識做，都好熱情招呼，帶佢去大雄寶殿、天壇大佛遊覽，仲請客人品嘗齋菜添。其實三碌拎好想同寶蓮寺拍住上吸引遊客，希望第日昂坪市集搞活動，釋智慧唔好鬧佢哋騷擾佛門清淨地啦。
拜會「地主公」之後，李殷泰形容釋智慧精神好好，不但健步如飛，行樓梯仲快過好多後生仔添！講番佢份新工，上任之後，佢即刻面對棘手嘢，事關三碌拎呢個月十七號開始關閉六個禮拜大修，佢哋希望十．一重開，所以李殷泰一上任就要度橋，構思將三十六架水晶車廂底部嘅橫樑移走，變成完全不設防，等乘客坐得更過癮。