要喺政壇造時勢，首要條件就係同政黨、團體打好關係，爭取支持，CY嘅部署亦一樣，尋日雖然係周末，佢一樣喺富貴黨舉辦嘅促消費行動露面，幫手推銷該黨嘅消費券。大家問起佢係咪有心喺特首選舉中落場跑，所以乜嘢場合都見佢﹖CY微微一笑，話多年嚟都有參加社區活動，寫專欄亦維持多年，至今已經寫咗六百篇，亦接受過唔少專訪，絕對唔係家吓先爭取曝光率。

呢個答案好明顯係有備而來，咁佢覺唔覺得自己係落場跑嘅大熱人選呢？佢好謹慎咁話：「唔能夠咁講，根本熱門嘅前提都冇，所以我睇仲係做好自己本分、自己嘅公職。」佢跟住向學生推薦英雄造時勢嗰本書，大家又問佢係咪暗示特首之戰要英雄造時勢，又或者時勢造英雄，呢個時候，CY笑笑口好鬼馬咁拆招：「你講邊個呀？依家邊個選特首呀……」然後就封嘴。

撐富貴黨場套關係

佢雖然嘴上唔講係咪落場跑，但同政黨套關係就一啲都唔手軟，尋日嘅活動係富貴黨搞嘅，而富貴黨同另一個疑似特首熱門唐英年關係密切，CY冇理由唔知，但佢依然捧場。富貴黨都禮尚往來，副主席方剛知道CY將會去絲綢之路，而且生日亦快到，所以特登搵咗本有關絲路嘅書送畀佢。CY見到富貴黨咁有心，亦被氹得好開心。

較早前，賭王何鴻燊曾經話唐唐做特首嘅賠率係十賠一，尋日問到CY知唔知賭王近況時，佢話詳細情況唔適合講，但會祝賭王早日康復喎！