呢啲就叫做未見官先打五十板！政府真係咁關心市民健康的話，在三十三度的盛暑下，好應該關照吓住籠屋及板間房的勞苦大眾，外面氣溫三十二度，籠屋的室溫分分鐘成三十六、七度，晚上都成三十三度；佢哋有啲連風扇都唔敢開，你話如果仲要加兩成電費，才可換來延長多一個月的壽命，我相信好多勞苦大眾情願減一個月壽命，換取減兩成電費！

環保團體批評項項措施都未有時間表，搞得嚟，閣下的氣管炎已變頑疾，去公立醫院排期睇胸肺科，快則三年零八個月，輪到時，天國已近了！再說，本港空氣質素，很大程度亦受珠三角熱能發電廠的排污影響，兩地理應加強合作，但諮詢文件未見提及。

筆者見到政府搞環保雞手鴨腳，淨係處理上水河上鄉非法傾倒建築廢料一事，都搞到好似鐵金剛勇破罪惡城咁！倒咗成兩個足球場咁大範圍都偵查唔到元兇。唉，有隻烏蠅飛來飛去幾十次，你都可能睇到佢係雌定雄喇！

吾鄉有一種職業叫「專業放生」，由一些祈福的老人家出錢，買一些行將被人烹宰的魚或鳥，將牠們放回大自然；專業放生者為了圖利，抓來更多的魚、鳥，過程中難免有更多死傷；這種「放生」，跟港府的環保政策有點類似吧！