呢嗱，市面流行一款節能環慳火產品，話放喺氣體煮食爐爐頭上面，可以用少啲氣。小數怕長計，依家搵食艱難，梗係慳得就慳啦，唔怪得呢款節能環有唔少「煮婦」捧場，可惜，呢種產品原來存在嚴重安全問題，隨時成為家居陷阱。

土瓜灣一對婆媳舊年四月喺屋企用節能環煲湯嗰陣，雙雙中一氧化碳毒缺氧死亡。死因庭前日裁定兩人死於不幸，家人相信悲劇同節能環有關。裁判官更質疑，事發已經十五個月，有關部門點解一直冚到實，唔肯將件事公開？

叮！搞出人命咁大件事，機電署、海關居然冚得就冚，一直冇採取任何行動。市民對「奪命環」毫無警覺，隨時又釀成慘劇，咁唔負責任嘅政府，同「幫兇」有乜區別？

學者話，慳火產品如果同爐具唔配合，會令氣體燃燒唔正常，產生無色無味嘅一氧化碳，殺人於無形。慳錢不成變攞命，唔係講玩㗎，對於呢類產品，政府有責任加強監管，透過宣傳教育，提醒使用者注意，如果唔符合安全標準嘅，更應該強制回收，禁止使用。

消委會早喺九七年已經測試過呢類所謂節能產品，發現安全有問題，並且呼籲消費者停用。但有關部門不但無動於衷，而且仲互相卸膊，好似乜都唔關自己事咁。

機電署回應話，舊年七月跟進一篇涉及有關產品嘅報道後，同消委會進行測試，發現使用節能環會令氣體燃料出現唔正常燃燒，排出嘅一氧化碳幾分鐘內激增至安全標準七倍以上，效果等同燒炭，佢哋當時已通知海關跟進。海關例牌否認冇跟進事件，話舊年九月底搜查過油塘一個街市嘅攤檔，檢獲一百零六件有問題嘅「節能器」，有關產品負責人事後已被檢控同判處罰款，貨品亦被充公。

叮！呢類產品十二年前就被發現有安全問題，賣到成行成市，兩個部門淨係做咗雞碎咁多嘢。機電署將個波踢畀海關，海關係咁意做場大龍鳳就算數。一個街市就檢獲百幾件，可想而知全港有幾多家庭買咗問題產品，又有幾多家居陷阱隨時爆大鑊，政府唔通真係要等到爆大鑊至做嘢？

叮佢個鎯鎯！本港產品監管制度直頭好似個爛魚網咁，周圍穿晒窿。例如當局對售賣散裝危險化學品冇嚴格規管，「買鏹水易過買煙」，搞到有細路喺屋企自製炸彈被炸傷；又例如超聲波驅蚊機驅唔到蚊，損害聽覺不特止，仲隨時可能短路引起火燭；依家連節能環都變埋奪命環添。唉，家居陷阱處處，旨意呢個政府，真係死得人多咯。