港台關係好轉，全國政協常委楊孫西牽頭搞咗檔中國和平統一促進會（和統會）香港總會，楊做理事長，港區政協委員高敬德做會長，盧文端做秘書長，聽講已經籌到四千萬元嘅啟動經費，仲揀咗港島核心地帶嘅一座商廈高層做辦事處，下星期四正式成立，不過，呢個會未成立就引起爭議。
立法會主席曾鈺成答應為香港總會做會務顧問，白鴿黨主席何俊仁尋日卻質疑，和統會係高度政治敏感組織，曾鈺成唔應該擔任任何職位，以免影響立法會嘅政治中立同公信力。而曾鈺成就以書面回覆話堅持唔會同立法會主席嘅角色有矛盾。
其實曾鈺成都算惹火，做咗立法會主席一年，非議聲音時有所聞，除和統會香港總會單嘢，白鴿黨尋日約見佢，當面提出叫佢遵守當日選主席時講過唔會公開評論時政嘅承諾，擔心影響立法會主席嘅中立性。但白鴿黨都唔好得去邊，黃成智喺立法會選舉中虛報社工一職單嘢都未解決，分分鐘搞到廉署介入都未定，簡直係「五十步笑百步」！