新聞處處長馮程淑儀（Betty）八月便調職去康文署做署長，但佢早喺政府宣布調動前一日已申請放假，仲放成個月，睇嚟係趁暑假陪愛女。
政府憲報尋日公布Betty自二十日起放假，本來想八吓佢去邊度旅行，點知佢放假之後，連秘書都跟住放假。據講，Betty會放一個月假，至下個月十九日先返工，準備工作交接事宜，下月尾就轉往康文署。
早前先傳出Betty覺得新聞處處長嘅工作太纏身，要二十四小時Stand-by，佢難以照顧家庭，搞到畀阿囡詐型，話Betty係佢嗰間學校中唯一唔湊阿囡返學嘅媽咪，唔知Betty調職後可唔可以騰出時間湊阿囡呢﹖
