立法會研究雷曼事宜小組委員會尋日開過閉門會議，決定再度傳召韋奕禮，而下一個目標就係曾俊華，立法會有特權法呢把尚方寶劍，只要傳召令一出，韋奕禮同鬍鬚曾就要乖乖報到。不過，二十二個委員中，搵唔搵得齊七個法定人數開會係問題。

因為好多委員已經訂好機票外遊，會計界嘅陳茂波二十八日就會同家人飛英國旅行，「卿姐」劉慧卿要離港參加聯合國種族問題會議；「潮州甘」甘乃威話，本來約好老婆喺八月三號飛捷克布拉格旅行，佢尋日已經同老婆報定案，隨時要因應開會日期，提早結束行程，或者揼低老婆喺捷克，自己先行返港。睇嚟，議員都係搞掂自己嗰邊再去傳召人哋好啲。