鬍鬚曾尋日先去一個團體嘅閱讀分享會，同啲青少年講吓閱讀心得，之後就喺隨員、會展保安嘅陪同下巡書展，唔知係咪日前煲呔曾巡場遭到批評，鬍鬚曾尋日刻意帶少咗人，又搵保安隔開傳媒，但呢個安排阻礙採訪自由，引起現場記者好不滿，加上保安人員要交功課，結果反而引起衝突。

入到會場後，鬍鬚曾喺保安員同隨員嘅包圍下，以一個大人圈方式巡場，呢個安排搞到人哋接近唔到佢，佢亦好難埋到書檔，好似生人勿近咁款。最後佢匆匆去到一個書攤前揭咗兩本書，其中一本就係內地按紅樓夢故事創作嘅漫畫書《熙鳳弄權》，睇嚟鬍鬚曾對紅樓夢裏邊掌管賈府財政大權嘅璉二奶奶亦感到好奇，不過，佢最後都冇掏荷包買。

尋日書展裏邊人頭湧湧，鬍鬚曾呢個人圈入咗去後，想冇混亂都難啦，擾攘咗十分鐘，佢都無奈快閃離場。