三司十二局開心放暑假嘅頭係由政務司司長唐唐帶起，佢尋日開始放假十五日，直到下個月十日先返工，教育局局長孫明揚除做原職之外，仲要兼埋佢嘅工作；食物及衞生局局長周一鑊跟住喺下周一（二十七日）起放假，副局長梁卓偉要頂更四日；之後再有財經事務及庫務局局長陳家強自本月三十日至下月五日放假，副局長梁鳳儀順理成章亦要頂更。除咗放暑假要頂更外，運輸及房屋局副局長邱誠武及商務及經濟發展局副局長蘇錦樑亦要為外訪嘅上司頂更。

立會大彈三宗罪

所以話七月中至八月中呢段時間，下亞厘畢道嘅政策局將會輪住署任，副局長們要相繼坐更亭。早排佢哋先畀立法會內會正副主席大彈特彈，話佢哋唔熟政策、唔敢去立會兼唔敢答問題，呢三宗罪更好似成為副局長嘅形容詞一樣，今次副局長連環頂更，會唔會頂出禍呢？

副局長頂更早已唔係新鮮事，但撞啱咁多局都係暑假中由副手署任，卻係舊年擴大政治問責制之後嘅首次，所以好多人都覺得危危乎。又係嘅，豬流感一日惡過一日，周一鑊放假期間，梁卓偉要一人啃晒食衞局嘅工作噃，都咪話唔驚；財經局雖然搞掂咗雷曼賠償，但係金融海嘯嘅下一波幾時嚟冇人知，梁鳳儀頂更唔知使唔使用盡彈藥呢？蘇錦樑、邱誠武嘅表現也唔見得令人安心，大家惟有金睛火眼實副局長署任啦。