依家個個撳住荷包，聽到「加」字毛管都戙埋，海洋公園竟然趁火打劫，早排宣布由下個月起門票加價兩成。立法會一個委員會尋日通過一項無約束力動議，要求園方押後加價。有議員批評，海洋公園近年頻頻加價，擔心因為咁令入場人數減少，門票加完又要再加，造成惡性循環，亦有議員要求園方暑假之後至加價。

海洋公園主席盛智文話，如果押後一到兩個月加價可以令市民開心，「冇嘢唔可以改變」，不過要先同董事局傾吓喎。鬼馬主席開到聲，睇怕加價押後到十月份都冇乜走雞咯。

就算係咁，海洋公園都唔等於收回成命唔掠水，不過係遲啲掠啫。唔使問，市民梗係唔收貨。問題係，園方話加就加，而且一加就兩成，畀議員鬧一鬧，即刻就變咗有得傾、有數講，有冇兒戲啲吖？更離譜嘅係，海洋公園提出加價以來，政府身為大股東，睇住市民畀人「打劫」，竟然好似鵪鶉咁粒聲唔出。

叮！唔該商務及經濟發展局局長劉吳惠蘭幫手解吓畫，盛智文一開口就話可以遲兩個月加價，即係話呢次加價根本冇迫切性。政府明知暑假係旺季，加價影響好大，點解當初冇幫小朋友諗吓，要求海洋公園遲啲至加甚至唔好加呢？係買佢怕，定係太戇居？

其實，每次有大機構加價或者取消優惠，政府就變咗縮頭烏龜，乜都唔敢做，任人哋亂嚟。香港迪士尼樂園、港鐵、巴士、隧道仲有領匯都係咁，通通開晒綠燈。最搞笑就係，政府做咗鵪鶉仲要扮英雄，話咁做係唔想干擾市場運作，「尊重商業決定」，將責任推得一乾二淨。

呢次海洋公園雖然將措施押後，但加價係遲早嘅事。佢哋話，公園五十五億元翻新工程要透過政府擔保借貸三十億，利息高達五厘，兩年後開始償還，唔加價頂唔順，到時甚至可能要政府注資。政府尋日回應話，會同園方再研究借貸息率。

叮！依家至話息率可以商量，遲唔遲啲吖？香港納稅人係海洋公園嘅大股東，政府居然做大耳窿，園方冇你咁好氣，將所有開支轉嫁畀市民，咪盞攞納稅人嚟搞。仲有呀，香港迪士尼擴建，政府貼埋大床做嫁妝，將貸款變股權；海洋公園翻新，政府又玩放「貴利」，真係唔知想搞邊科。

無他嘅，政府當納稅人啲錢係身外物，點Fing都冇相干，至緊要唔使自己煩，保住頂烏紗帽，咪愈搞愈亂、愈搞愈離譜囉。叮！