24/07/2009

播放本新聞相關短片

政情:鬍鬚曾出陰招自保

立法會班議員早前敲晒鑼響晒鼓,話要開財經事務委員會特別會議,召財爺鬍鬚曾解釋欽點攞命陳接任金管局總裁單衰嘢,點知有報章報道話又因多名議員掛住放暑假外遊同外訪,搵唔夠法定人數開會。

原來鬍鬚曾出陰招,近日發散人馬明示或暗示叫班建制派委員唔好支持開會,或扮忙冇時間開,等佢可逃過畀立法會公審嘅命運。等立法會十月復會時,攞命陳已正式上任,到時社會嘅關注點已轉咗落攞命陳身上,唔會再對之前嘅委任程序追得咁緊。

本來唔少建制派議員一早安排咗暑期活動,唔想為呢單嘢改期開會,順便可幫鬍鬚曾一把,但部分人就好不滿當局竟向傳媒放風,即係完唱,老屈佢哋偷懶。究竟鬍鬚曾嘅奸計能否得逞?等多幾日就揭曉。

直擊人類豬流感最新疫情
詳情瀏覽on.cc《奪命流感》