崔世安朝早由青洲坊會負責人陪同下，巡視青洲社區同興建中嘅經濟房屋建設進度，同啲住戶、街坊面談，聽取佢哋對施政嘅意見。崔世安喺探訪期間遇到故友，仲主動打招呼：「波叔，你都好精神喎！」已七十五歲嘅波叔事後對記者講，原本佢係青洲木屋區嘅居民，但數十年前青洲木屋區大火，數百戶家園遭焚毀，逾千個災民無家可歸。當時有青洲區嘅學校主任出面為災民向崔家求助，結果唔使一個禮拜搞掂晒，佢哋幾日內即時上樓。所以波叔專程趁崔世安落區，代表當年受助災民直接向崔世安表示感謝，佢希望崔世安上任後要致力改善民生，令澳門市民安居樂業。

崔世安話青洲木屋區已發展二十幾年，目前主要係基礎設施需要改善，佢上任後會關注，特別係該區嘅飲食具有本地文化特色，會改善設施令該區居民有更好嘅生活環境。