24/07/2009

播放本新聞相關短片

政情:黑英講古冧盡小朋友

天文台前台長「黑英」林超英尋日去書展兒童天地講古仔,吸引咗七十幾個家長同小朋友嚟捧場。咁講乜嘢古仔呢?當然係同佢嘅專長有關啦!古仔叫《氣候變了怎麼辦?!》,咪以為個題目好悶,黑英不時扮吓動物叫,又出題目考啲小朋友,答啱仲收到糖同書添,反應不知幾熱烈。

黑英對啲小朋友識答有關溫室氣體、臭氧層嘅問題覺得好安慰,仲話依家啲小朋友對氣候變化嘅感覺仲深過班大人。但佢謙稱對自己嘅表現唔係太滿意,話一向希望講古仔時好似聽棟篤笑咁,個個笑到唔停口,但班家長冇乜點笑,所以覺得唔合格。

睇怕佢要求太高啫,事關佢講完古仔,班小朋友即刻圍住佢又攞簽名又要握手,仲要用「包剪揼」嚟爭剩低嘅幾本古仔書。咁受歡迎,證明佢講古仔悶極有限啦!

直擊人類豬流感最新疫情
詳情瀏覽on.cc《奪命流感》