24/07/2009

播放本新聞相關短片

政情:政界蘇民峰急件點化林鄭

本文重點
立法會議員劉秀成早前自爆幫過多名前港督去港督府睇風水,又公開品評三名疑似特首候選人嘅大宅風水布局,十足政界蘇民峰咁。最近佢又再發功,建議發展局局長林鄭月娥改名轉運,但唔係改林鄭個名,而係備受爭議嘅強制收樓條例。

為加快舊區重建進度,林鄭早前向立法會提出《土地(為重新發展而強制售賣)條例》,建議將強制收樓嘅法定門檻,由現時嘅九成業權下調至八成,惹嚟好多舊區小業主同草根派議員反對,批評政府偏幫大地產商欺壓小業主,逼佢哋賤賣資產租貴樓。

畀人拆招牌居多

代表建築界、一直好關心舊區重建嘅劉大師,日前以「急件」方式去信林鄭,指條例中「強制」一詞好難聽,容易令部分社會人士誤解為「強迫」業主賤賣資產,建議用「促進」嚟代替,改為叫做《土地(為重新發展而促進售賣)條例》,藉此加強整條條例嘅認受性。

但條例涉及咁多舊區居民、即係班草根派議員啲選民嘅利益,又點可能單單改名就解決到?估計林鄭亦唔會諗得咁天真。睇嚟劉大師今次都係食檸檬,畀人拆招牌居多。

直擊人類豬流感最新疫情
詳情瀏覽on.cc《奪命流感》