扮嘢文尋日一拖二，海洋公園三巨頭赴會，一開波就「哭」訴海洋公園因翻新工程要使成五十五億元，兩成半問政府借，剩低七成半就向二十五間銀行籌旗，「合皮」兩年後每年就要還三億，孭咗成身債；仲話亞太區周圍都係競爭對手，又猛話公園年年勁多門票折扣優惠，率先創造生日免費入場，實際得兩成人要畀全票錢入場；而當年賽馬會畀嘅兩億信託基金，至今一毫子都冇用過，希望保到非常時期先用。

拖埋迪士尼落水

跟住扮嘢文仲拖埋迪士尼落水，同啲議員一齊鬧，話海洋公園唔希望成為納稅人負擔，話借咗政府啲錢一定有借有還。如果唔加價，真係擔心要政府注資，甚至將負債變成股權，變咗迪士尼翻版。最後佢話如果唔加價、唔擴建原地踏步，冇晒競爭力，海洋公園隨時會執笠，咁真係吊頸都唔掂。

聽到咁講，有議員繼續批評海洋公園密密加價，亦有議員炮轟政府之餘幫扮嘢文講好話：「點解我哋要受美國霸權主義控制，要走去美國跪地餵豬乸求佢，仲要送六十幾億畀佢使，但海洋公園財困就唔去協助，借貸仲要收五厘息咁嚴苛！」

委員會最後通過動議要求海洋公園撤回加價，扮嘢文唔知點算之際，有議員提議最少過埋暑假，遲兩個月十月先加，佢即刻打蛇隨棍上話咁就問題唔大，如果遲一、兩個月大家開心啲嘅，冇嘢話唔可以改變嘅。