太一叮想講嘅，就係喺正路人頭頂嘅招牌呀！嗱，旺角彌敦道夠晒繁忙啦，嗰度嘅招牌唔單止密密麻麻兼條條Fing，最得人驚嘅係，幾乎舉高手都摸到咁滯，姚明行過跳一跳，肯定撞崩頭！

咦，咁就奇怪嘞，乜屋宇署唔係有個《安裝及維修廣告招牌指引》，白紙黑字寫到明設喺行人路範圍內嘅招牌，應該同行人路地面相距最少三點五米，而招牌同行人路邊更要有最少一米距離咩？

本報記者去睇過，好多招牌離地得標準距離一半，咁都未算牙煙喎，有啲同行人路邊只有一米距離，甚至幾乎同行人路邊拍齊添。

唔係講笑，呢條超級繁忙路段閒閒地有超過四十條巴士線行經，仲有大把市民喺巴士站等車，如果巴士要駛貼埋站，撼正招牌再反彈落街，後果真係不堪設想呀！

仲有呀，唔好以為旺角內街會好啲呀，登打士街、上海街呢啲內街一樣招牌林立，好多離地面只有一點八米左右，一樣咁無王管。嗰度經常會有貨車泊埋行人路落貨，再加上周街易拉架冇人理，如果司機視線受阻撞埋招牌，路人實冇運行都得嘞。

根據《建築物條例》規定，安裝戶外廣告招牌屬於建築工程，要事先得到屋宇署批准圖則以及同意施工至可以展開工程，點解危險違規招牌依然成行成市呢？仲使講，分明就係屋宇署署長區載佳發雞盲啦！

難怪立法會議員王國興炮轟當局依家仲未就招牌確立一套有效嘅登記制度，無法有效監管，一味只係見步行步，助長危險招牌問題。

唔係嚇大家呀，目前全港招牌數量有二十萬個，當中有二萬個左右屬於棄置招牌，可見通街都係計時炸彈，行街直情係搵命博呀。呢嗱，去年就發生咗一單「六月飛牌」事件，灣仔道一間泰國菜館有個二百磅木製招牌突然跌落嚟，一名女途人就咁冇咗條命，都咪話唔驚。

除咗招牌之外，鬧市嘅高樓大廈仲有好多城市危機，好似話射燈、喇叭咁吖。單單銅鑼灣、旺角行人專用區以及深水埗，商舖外牆嘅射燈至少有五百支。

冇錯，目前嘅大廈外牆工程一般受到《建築物條例》監管，不過唔講唔知，原來呢條條例有灰色地帶，只係監管承托物嘅支架，如果係射燈、喇叭，屋宇署分得好清楚，只係當儀器、裝置以及設置，即係話唔關佢哋事。

嗱嗱嗱，話口未完，上個月就有個男子行過奶路臣街，無端白事飛來橫禍，畀個重十磅嘅喇叭箱跌落街扑到正，當堂昏迷不醒，問你怕未？

所以經機會度條「拆招牌，保就業」嘅屎橋出嚟有乜用吖，反正當局講完就算，拆咗一個招牌，仲有千千萬萬個招牌，簡直嘥氣啦！計太一叮話齋，不如拆咗屋宇署嘅招牌，叮爆署長區載佳嘅鎯鎯好過啦！