早前喺一個新書發布會上遇到「電器大王」、香港信興集團創辦人蒙民偉嘅公子蒙德揚（圖），佢都話電器業嘅零售市道有好轉，當中以LED四、五十吋大電視嘅銷情最為理想。

講講吓佢突然推銷員上身，叫屋企仲用緊舊式顯像管電視嘅家庭快啲換部超薄電視，事關舊式電視一般都有成兩呎厚，但新式嘅LED電視最薄只得一、兩吋，換部超薄電視拍埋牆擺放，間屋分分鐘多出幾呎地方，以依家山頂豪宅嘅呎價換算，慳番嘅地方真係閒閒哋賺番幾萬蚊喎！花錢換電視機變相有錢賺？蒙公子所講嘅係歪理定真理，就真係見仁見智嘞。