海洋公園保育基金主席陳晴，近日新作《兩晴相悅—熊貓晴晴和我的故事》面世，為大熊貓基地重建基金撲水，仲搵咗熊貓館嘅「盈盈」、「樂樂」喺佢後面即場食竹葉影相造勢。佢透露，為求專心出書，幾個月前辭去美林（亞太）有限公司全球財富管理投資部總裁份高薪厚職，晚晚「爬格仔」趕功課。
佢喺書中分享邂逅「晴晴」並成為「母女」嘅經過，又提及早前四川大地震，「晴晴」一度失蹤多日，嚇到大家以為佢有不測，「晴晴」後來被發現原來畀自己間小木屋壓住，手掌受咗傷，脫險後多日依然驚青到唔肯食嘢。陳晴喺地震後三個月再訪「晴晴」，心情激動到又喊又笑。
金融海嘯後籌款艱難，佢唔想難為身邊朋友，於是出書擴闊「水源」，目標係未來五年籌得兩千萬元善款。