上禮拜四，港區全國人大出發考察煤礦之鄉山西，考察唔係遊山玩水，舟車勞頓在所難免，大家都預咗，但係諗唔到今次雙腳最受罪，事關第一日行程以參觀煉鋼廠同工業園為主，山西重工業名不虛傳，規模零舍大，齋行都行到腳跛。
山西係重工業大省，一向畀人嘅印象係污染嚴重，全國人大常委范徐麗泰話，人大考察團喺山西首府太原落機時撞啱大雨，個天灰蒙蒙，大家以為日日都會係咁，諗唔到當雨一停，成個天都清晒，藍天白雲出晒嚟，大家心曠神怡，大讚山西省嘅控制污染工作有進步。
山西以重工業為主，唔似得去廣西、安徽咁，有咁多湖光山色景區，而大型煉鋼廠同工業園就多的是，而且間間規模宏大，佔地廣闊，港區人大呢班鴨仔團入裏面參觀，行到腳仔軟，加上行程仲包括遊覽山西博物館，又係得個行字，冇得坐。聽范太講，唔少團友因為行咗好多路，第一日已經攰到嗌救命。嘩！山西考察團仲有幾日行程，睇怕各位人大仲有排「歎」囉！