Jeremy尋日出席一個活動，公關事先講明Jeremy有嘢講，但見到記者在場都掂行掂過，後來畀記者兜截到，問佢總結過去一年做政助嘅表現，佢話覺得自己已經做得幾好，仲話佢一直都「冇特別期望自己做到啲乜嘢特別目標」。吓！冇期望，冇目標，咁點樣評定做得幾好呀？似乎有啲前言不對後語喎！

學煲呔曾「民望如浮雲」

佢認為可以參與語言微調呢個大政策，喺推行政策上幫手喺局方同學校之間做協調工作，已經好鼓舞喎！仲話政府要聽取好多意見，之後再搵出個平衡點，冇乜可能全部人都滿意，只要對學生係有好處，就應該推行，而佢亦認為政府做嘢，最重要係有交帶。

雖然前排有民調顯示Jeremy已經係少數市民記得嘅政治助理，但佢話首要係立法會議員認識佢，然後係區議員、有關教育嘅部門同團體、校長議會等等，市民喺佢心目中連五甲都不入，仲話市民識唔識佢根本唔會影響佢點做嘢！

Jeremy冇直接評論最近問責班子日日畀人鬧嘅新聞，但就指「鬧」係依家社會嘅政治文化，當初揀得呢份工，就預咗畀人鬧咁話。佢仲話依家社會有好多唔好嘅聲音，佢嘅工作就係要做協調，即係總會得失一啲人，所以畀唔畀人鬧都一樣咁做嘢，冇期望過有議員讚佢做得好。

好學唔學，學埋煲呔曾「視民望如浮雲」嘅態度，咁好容易適得其反，令人覺得佢漠視民意㗎。雖然佢話未入職前已經檢討過點做呢份工，依家睇嚟都係時候再檢討吓嘞，咪以為讚自己讚得多，就真係做得好先得(口架)！