立法會政府帳目委員會尋日就平機會行政混亂同大花筒醜聞發表報告書，批評平機會死唔認錯，更認為平機會運用公帑嘅大花筒作風「完全不可接受」。而主席鄧爾邦就被指「未提供其職位所需的領導能力」，令平機會企業管治達唔到法定機構嘅應有水平。

通俗啲講，咪即係話平機會揮霍無度搵納稅人老襯，鄧爾邦尸位素餐白人工囉。不過報告對鄧爾邦所作所為只表示「極度遺憾」，冇用到「譴責」字眼，帳委會就話，考慮到審計報告嘅嚴重性未達到受譴責嘅嚴重程度。至於鄧爾邦使唔使炒，佢哋就話留番畀行政部門決定喎。

叮！大花筒唔使即時執包袱，未啱數喎！港人直頭「極度遺憾」啦。鄧爾邦將平機會變成佢嘅獨立王國，隻手遮天做「山大王」，管理亂龍唔在講，使阿公錢一啲都唔肉赤，損公肥私醜聞成匹布咁長：自把自為用公帑購買超豪人壽保險、去北京出差要住「大使套房」、收到審計報告後以保密做藉口，對委員隱瞞內容。咁都唔使問責炒魷，仲有天理嘅？

話時話，既然鄧爾邦根本係濫竽充數呃人工，點解可以坐上主席個位，仲坐咗咁多年嘅？政府出咁高人工請個人返嚟倒自己米，納稅人就算谷到爆都冇辦法郁到佢，咁仲成世界嘅？

叮！公營機構董事局成員或委員全部由政府委任，黑箱作業，話請邊個就請邊個，市民完全無權過問，更加無從監督。至離譜就係，政府對呢啲機構嘅財政同運作冇監冇管，冇一套嚴密監管公帑使用同申報嘅程序，亦冇心改善機構嘅內部管治，畀佢哋自己玩晒，唔怪得公帑係咁Fing，醜聞係咁爆啦。

公營機構高層近年排住隊爆出大鑊嘢，信保局前總監張錦基被踢爆涉嫌利用公幹名義，多次走去內地冶遊；前副私隱專員林永康因為用公帑去海外探親，被控以權謀私騙取超過十萬公帑，判監九個月；前私隱專員劉嘉敏離任前未經公開拍賣，賤價買入電視機同梳化等一批家具益自己；至於應科院使十八萬請人睇風水，更加成為國際大笑話。

申訴專員公署尋日發表前專員戴婉瑩嘅卸任年報，署方○八至○九年度接到五千幾宗投訴，比上年度多咗百分之八，證明港人需要高效率低成本嘅公共服務。但係好似平機會呢類「政治花瓶」成本高到離晒譜，效益低到冇人有，仲時不時整鑊杰嘢畀港人歎，早就應該摺埋啦。

煲呔曾前幾日回應「七一」十萬人上街，話已經聽到市民聲音。既然係咁，唔該快啲做嘢，將淨係揩油唔做嘢嘅鄧爾邦速速叮走啦。