政府對抗人類豬流感疫情，初期又封酒店，又要病者家居隔離。尋日喺中環遇到經營語言中心嘅勞工處前助理處長周東山，佢猛呻話豬流感爆發初期，政府緊張搞到市民都緊張埋，唔敢畀子女參加課餘活動，令佢間學校生意額大跌四成，幾經艱苦總算捱到依家，但有啲行家就唔好彩嘞，捱唔住要被迫結業。
周東山話豬流感嘅致命個案同普通流感差不多，而咁耐以來，人類同流感互相適應，呢個係自然過程。
啱啱先鬧完政府係緊張大師，差啲打殘佢，但轉頭佢又幫政府兜番。佢話都難怪政府咁緊張嘅，事關最初對豬流感乜都唔知，殺埋嚟惟有做多少少，仲話政府決定提早放暑假都有好處，事關家長唔想子女放假無所事事，會讓子女參加課餘活動，令佢間學校生意回升，加上有行家結業，部分生意亦流向佢間學校，都算係好彩囉。呵！唔怪之得啦，原來佢係豬流感嘅受惠者，唔怪得批完政府又呵番，正一係一啖沙糖一啖屎！