好多人都對術數、風水好有興趣，原來立法會建築、測量及都市規劃界議員劉秀成係立法會嘅隱世風水師，而最近喺龔如心千億元遺產案中作過供嘅風水師余若愚，就係佢讀喇沙中學時嘅同學，數學非常好之餘仲精於《易經》。
劉秀成話做建築嘅好多都識風水，事關風水係一門好科學嘅學問，甚至稱得上係非物質文化遺產，而佢做咗建築師冇耐就去拜師學藝，但學嘅都只係最簡單嘅睇羅庚同埋「九官飛星圖」，依家就連風水師傅個名都記唔起。
佢仲自爆有次去前港督府同港督尤德見面，尤德問佢滙豐銀行總行重建，會唔會對佢有影響。劉秀成當時話畀尤德知唔緊要嘅，但原來佢心裏面唔係咁諗。風水先生講嘢梗係避重就輕、婉轉啲，可能佢乜都未學到就學到呢樣。點知冇幾耐，尤德就喺北京就香港前途談判期間心臟病發逝世。