本文重點
眾所周知，葉劉淑儀以前做過保安局局長，經常喺議事廳同議員火併，依家轉咗位做立法會議員，倒番轉頭插啲舊同僚亦唔手軟，而依家蒲咗出嚟嘅幾個疑似特首參選人當中，有人係佢嘅舊同僚，亦有人係佢嘅舊下屬，佢又點睇呢？點知佢毫不留手，踩得就踩。
首先係喺葉劉做局長嘅時候，做工商及科技局局長、依家係政務司司長嘅唐唐，即係舊同僚啦。葉劉話唐唐太錫身，次次都迴避問題，好似樹木保育咁，一唔識答就推畀發展局局長林鄭月娥，好少親身上陣，上次包機事件又撻Q。
咁做過佢下屬海關關長、依家係財爺嘅鬍鬚曾又點呀？雖然煲呔曾一直想捧佢愛將鬍鬚曾上位，但葉劉對呢位舊下屬嘅表現都唔多滿意，批評鬍鬚曾喺立法會嘅表現「弱雞」，成日畀議員砌，冇得還手。葉劉仲話曾經寫信提醒過鬍鬚曾，咁搞法好影響政府形象。
主動獻身教路又點吖，又唔見鬍鬚曾有任何改變，正所謂意見接受，態度照舊，葉劉嘥心機啦！但聽佢咁踩唐唐同鬍鬚曾，睇怕兩位都唔係葉劉心裏面杯茶。
話CY好努力
咁由「Ｎ屆都唔選」轉咗口風話「二十年都有人畀意見我選特首」嘅行政會議召集人CY梁振英呢？葉劉初時有啲反常態，竟然唔多肯講，仲話唔方便評論添！有乜嘢唔方便？佢冇講，最後只係話CY好努力，但暫時未約佢食飯。
跟住單刀直入問葉劉有冇諗過拋個身出嚟選？佢一句：「邊有咁嘅本事，身家唔夠厚、冇父蔭、內地又唔識咁多上海人。」一聽就知係寸唐唐啦，但佢冇乜點彈CY喎，明顯親疏有別，而葉太又冇話自己唔選喎，唔知係咪留後着？