立法會公務員事務委員會尋日開會，討論公務員薪酬調整及職系架構檢討，公務員事務局局長俞宗怡畀多個公務員團體狂插，話佢以減快加慢手法處理公務員薪酬調整。

奇就奇在，畀公務員團體冇大冇細係咁炮轟，俞局長唔單止冇扯火，仲懶感性咁話公務員形象喺市民心目中有負面影響，令佢感到好痛心。

痛心？唔係啩？計太一叮話齋，痛係痛呀，不過應該係香港納稅人感到「肉痛」至真呀！香港公務員隊伍係咪全球最優秀，大家心中有數，之但係佢哋嘅薪酬，肯定係屬於數一數二咁高。

最弊係成班公務員懶到出汁，平時做嘢甩皮甩骨、冇心冇肺，搞到社會亂象百出，仲要畀咁高人工佢哋添，簡直係將公帑倒落鹹水海，試問小市民又點會唔肉痛吖？

叮佢個鎯鎯，唔該班公僕睇清楚出面嘅世界有幾殘酷先啦。金融海嘯殺到埋身，近二十萬人冇工開，打工仔唔係減薪就係放無薪假，有份工做已經要還神。成班高官又叫市民「共度時艱」，咁公務員係咪好應該減薪，當係同小市民共度時艱嘅體現？點知公務員團體一聽到個「減」字就嗌到拆天咁，仲妄想諗住有得加添，有冇再離譜啲呀！

呢嗱，據薪酬趨勢調查結果顯示，低、中、高層公務員今年應分別減薪百分之零點九六至百分之五點三八，點知有公務員團體係都要雞蛋裏挑骨頭，唔肯確認調查結果。

叮！如果有問題，其實早就應該喺薪酬趨勢調查結果公布之前講啦，使乜等到做完調查，發現唔啱聽至想推翻減薪結果？如果趨勢調查結果話全體公務員要加薪，睇吓有冇公務員團體走出嚟搵藉口抗拒吖，呢啲唔係「輸打贏要」係乜吖又？

仲有呀，既然薪酬趨勢調查顯示公務員應減薪，就好應該堅決執行，最弊係港府被公務員團體一施壓就即刻腳仔軟，最後決定中、低級公務員凍薪，只有月入約五萬元以上嘅高級公務員先至減薪，成個制度根本係形同虛設。

其實依家公務員形象之所以咁負面，完全係因為公務員事務局處理手法差，唔能夠一早擺平公務員團體，反而令到事件激化，互相謾罵，造成局方、市民同埋公務員三輸嘅局面，可見政府嘅管治權威已經蕩然無存。

講到底，咪又係嗰句「弱勢政府百事哀」囉，咁簡單嘅事都搞到一鑊泡，仲想班高官可以帶小市民走出谷底，發夢都冇咁早啦！