尋日又係每年一度嘅無國界醫生日，今年佢哋特別請到「軟硬天師」林海峰同葛民輝做榮譽行動大使，號召力果然非凡，有一百六十多個私營、公營同政府部門響應，由六月至今共籌得三百萬元，比舊年財爺鬍鬚曾籌多五十萬元。

據聞，鬍鬚曾係近三年籌款最差嘅宣傳大使，究竟係經濟差吖，抑或佢人緣唔好？咁就唔知嘞！

無國界醫生尋日舉行嘉許禮暨支票頒贈儀式，問阿葛對籌款勁過鬍鬚曾有乜感想？佢回應話：「咁又唔係，我哋兩個人夾埋先至籌到三百萬，除開每人都係一百五十萬啫，邊有佢咁多吖！」答得客氣兼大體。

眾多私人機構之中，以「彤叔」鄭裕彤長孫鄭志剛揸拂嘅新世界百貨中國捐款最多，捐出四十八萬元。至於政府部門方面，歷年捐款最多嘅稅務局體育會，今年繼續蟬聯捐款之冠，捐出近十三萬元，估唔到稅局收數，即係追稅叻之外，捐款都會咁爽手喎。