立法會公務員事務委員會尋日開會，除咗多個工會齊插公務員事務局以加快減慢手法處理公務員薪酬調整，仲有議員批評政府處理手法差勁，令事件激化，造成局方、市民同公務員嘅三輸局面。
一向理性冷靜嘅局長D姐俞宗怡突然間變得好感性咁同多個工會講說話，左一句話佢唔會喺背後抹黑公務員，右一句「公務員喺市民心目中有負面形象，令我痛心！」最後D姐仲要加多句「交往三年唔通你唔知我點諗咩」。
D姐一副難為了家嫂咁款，無非係想呼冤啫！之不過，點解啲公務員團體話有嘢反映，搵高官難過登天，有紀律部隊職方代表又話同局方溝通唔到，好似黑洞？若果係真嘅話，工會又點知D姐諗乜呀！