商務及經濟發展局前局長馬時亨辭官一年以嚟，孭咗幾份大義工上身，最近又有新動向，仲好猛料添，就係獲國務院屬下嘅中國投資有限責任公司延攬做智囊，成為呢個坐擁二千億美元（約一萬六千億港元）資本大企業嘅十四人智囊團之一。
中投新成立嘅十四人智囊團，全屬國際財金專家嘅星級人馬，除港人比較熟悉嘅肥亨外，仲有國家前副總理曾培炎、證監會前主席沈聯濤同中大校長劉遵義。中投係國務院屬下機構，負責為中國巨額外匯儲備尋找投資出路，可惜投資業績唔算突出，所以今次設立國際諮詢委員會，請嚟十四位猛人助陣，喺剛過去嘅星期日就由負責財金政策嘅副總理王岐山請食飯，畀足面子。
曾經叱咤投資銀行界，又做過特區財金官員嘅肥亨有份幫手出謀獻策，點計都算係一份榮譽。