尋日有個寧波服裝推介會，全國政協常委陳永棋當然有去撐場，仲巧遇多年冇見嘅師姐、已故船王包玉剛長女Anna包陪慶。兩人原來同屬美國Purdue University舊生，陳永棋修讀工業工程，Anna就主修心理學同社會學，但陳永棋入學時Anna已經畢業，兩人各自返港後出席舊生活動，先知同對方咁有緣。
講起喺美國讀書嘅趣事，陳永棋話由於家族從事製衣生意，畢業後曾留喺美國學維修衣車，所以佢唔單止識車衫，衣車壞咗都難佢唔到。佢及後返港發展，加入阿叔陳瑞球揸Fit嘅長江製衣，雖然有阿叔照住，佢一樣要由低做起，第一份工作係做量布員，負責將長度相近嘅西裝布料歸類，方便工人車衫。佢笑言當年抬布力大如牛，今時今日發福咗，一定抬唔郁喎。