「無能高官攞勳章」

答問大會嘅特色係抗議道具特別多、特別辣，仲特別搶眼。早前環保團體綠色和平避過保安，喺政府西翼外牆掛上諷刺煲呔曾係「氣候逃犯」嘅巨型「通緝令」，尋日繼續狙擊煲呔曾，喺立法會外派發「氣候逃犯通緝令」，印上煲呔曾個頭，配以黃色螢光底色，相當醒神，泛民議員響應環保，收咗之後冇即刻掉落垃圾桶，反而帶晒入議事廳擺喺枱面，表面睇好似黃牌趕煲呔曾出場咁，亦等如無聲公審煲呔曾，其中李卓人仲為通緝令加工，將煲呔曾改為「政制逃犯」，明寸煲呔曾拖延公布政改方案。

有雷曼苦主早前跳樓死控政府，白鴿黨甘乃威帶埋班雷曼苦主寫上「殺辛婦者，曾蔭權！」嘅示威標語入議事堂，仲豎到好當眼，加上長毛梁國雄嗰張嘅「雷曼苦主跳樓死，無能高官攞勳章」抗議紙牌，變相判咗煲呔曾係殺人犯。答問大會結束後，觀眾席上一位嬸嬸叫出嚟：「特首係兇手！」煲呔曾變咗「逃犯」同「殺人犯」，弱勢政府，沉淪至此，都算悲哀！

其實，經過「狗噏」事件同「代表論」之後，去答問大會已成為煲呔曾嘅噩夢，社民連諗出條新招招呼佢，就係以接棒式一浪接一浪咁離座抗議，先係長毛高呼「劫貧濟富」，然後攞住示威牌直衝煲呔曾，被保安帶走，休會兩分鐘後，又有陳偉業發難，喺位叫抗議雷曼事件口號，再度休會，點知一復會，再有黃毓民出手，一言不發衝出位，將個抗議紙牌怒擲喺煲呔曾面前嘅枱面，場面一片混亂，最後都係被保安送走。

連環抗議前後擾攘約十分鐘，搞到煲呔曾好冇癮，兼且要進出三轉議事廳，就算未至於行到腳痛，都夠佢煩啦！