03/07/2009

播放本新聞相關短片

用藥收費卸責 醫局玩殘醫生

如果唔好彩有人大件事送入醫院,係揀先收錢再救人,定係揀唔使畀錢不過醫生又唔知點救呢?A餐B餐一樣惡啃,點揀得落手吖。邊個咁大整蠱?咪又係至叻卸鑊嘅醫管局囉。

伊利沙伯醫院畀人踢爆,要旺角道車禍傷者家屬自費購買特效止血藥,公立醫院學埋內地醫院咁收咗錢至救人,市民嘈到拆天。衞生當局誓神劈願話絕對唔會「冇錢冇得醫」,救人大過天;又話係內部指引唔清晰至出錯,要修訂指引。

仲以為醫管局會從善如流令指引更加清晰,點知所謂「修訂」不過係將責任推晒落前線醫生度。醫管局聯網服務總監早排向各醫院發通告,規定拯救有「生命受威脅」嘅病人,用乜藥都唔能夠收費。但用藥使唔使收費就要由醫生決定,仲要寫Report交差。

叮!坐得呢個總監位,睇怕都係學醫出身啩,乜成個專諗縮數嘅「精算師」咁嘅?點至係「生命受威脅」,醫生同病人睇法唔同,醫生之間睇法都未必一致。表面徵狀唔明顯,其實可能好牙煙;就算血流滿面,又未必危及性命;離開急症室冇事,唔等於上到病房就絕對安全。咁嘅指引,愈指愈亂,仲衰過舊時。

醫生既要左諗右諗病人係咪有生命威脅,又要諗藥費收定唔收,對佢哋係不必要嘅壓力,唔單止拖延救命嘅黃金時間,更會增加病人同醫生嘅爭拗。醫管局根本就係搵笨,只不過將責任統統卸晒落醫生身上,唔使自己孭。正如公共醫療醫生協會會長何栢良話齋,當局只係想交功課,前線醫生搞唔搞得掂,就係佢哋嘅問題。

話到尾,問題根源係嗰個開藥分等級、用藥分貴賤嘅藥物名冊。政府唔肯增撥資源,又扮晒嘢叫醫生唔使憂用乜藥,直頭係虛偽。醫管局每年預算幾百億,用嚟買藥嘅開支得二十幾億咁濕碎,喺其他地方慳些少,乜都慳番嚟啦,使乜向市民開刀,難為前線醫生吖。

公立醫院以前口碑一直好好㗎,點解呢幾年愈搞愈得人驚嘅?鬼咩,自從食物及衞生局局長周一嶽主管醫療衞生之後,組織架構唔合理同資源錯配問題愈來愈嚴重,服務需求激增,但資源又冇相應增加,巧婦難為無米之炊,醫療醜聞愈來愈多又有乜出奇吖?

公立醫院問題積重難返,衞生當局每次都係出咗事至肯做嘢,而且只係頭痛醫頭。呢次伊院「冇錢冇得醫」醜聞,應該檢討嘅除咗用藥指引外,最重要係本港成個醫療架構,如果唔係,再檢討一百次都係得個吉。

係噃,周一鑊咪好似佢上手咁獲頒金紫荊星章嘅?當年楊永強抗沙士不力,疫情過後因為死難者家屬一句「厚顏無恥」,焗住提早收皮。公共醫療亂晒龍,周一鑊除咗無資格攞「荷蘭水蓋」,仲要鞠躬落台至啱數!叮!