下禮拜三係立法會今年會期最後一次大會，當日有正視七．一遊行市民訴求議員議案，又有討論領匯裁員同樹木管理嘅休會辯論，但建制派議員至今未收過政府嘅護航要求，反而政府喺休會前嘅最後一次吹雞事件，極可能發生喺今日嘅財委會，吹雞嘅就係林鄭月娥揸旗嘅發展局。
林鄭咁緊張，皆因泛民早前威脅，要當局安排考察完四川先支持第三期重建撥款；雖然其後泛民態度軟化，聲稱只要當局答應喺撥款後提交審計同工程專業報告，就會對撥款開綠燈，但林鄭仍然唔放心，怕泛民臨場跣佢一鑊。聽聞佢已向友好政黨拜碼頭，提醒記緊出席今日財委會，撥款未通過，去廁所都要快啲返埋位。
可能前車可鑑，早前發展局建議開設發展機遇辦事處，上財委會申請七百幾萬元開位，據聞之前有白鴿黨議員應承林鄭開綠燈，點知係空頭支票，到投票嗰陣白鴿黨同公文袋合力反對，好彩當日建制派夠人頭，撥款先不致甩轆收場。一朝被蛇咬，林鄭今日點可以唔買重保險呀？