黑英回想六二年喺英皇書院就讀中二時，銅鑼灣建築物唔多，光污染少啲，維園入夜後黑過墨斗，喺草地觀星確係一大樂趣。但佢話正因為維園夠陰暗，亦成為情侶嘅拍拖勝地，全場就只有佢同一位男同學喺度觀星。至於觀星有冇打擾其他情侶，黑英就冇交代嘞。

天文望遠鏡唔係人人買得起，黑英讀中二嗰年就自製望遠鏡，去鴨寮街搜購菱鏡、接目鏡同一塊六吋反射鏡，但咁大塊反射鏡去邊度搵呢？佢靈機一觸，買咗塊船艙窗門嘅圓形大玻璃，再用鋼沙磨到適合嘅弧度，單係買零件已用晒成份身家，於是嗰年暑假就邊度都唔使去，疊埋心水喺屋企磨玻璃。