03/07/2009

播放本新聞相關短片

政情:大輝教化世道

促銷手法層出不窮、無孔不入,唔少人覺得不勝其煩,勢估唔到連有「廠佬」之稱嘅立法會議員林大輝都學埋呢招。

咁佢又唔係促銷商品,只係喺近日寄出嘅最新議員通訊入面,附送已故一代禪宗大師聖嚴法師嘅「心六倫」語錄一份,等大家睇吓佛偈。

大輝係聖嚴法師嘅弟子,有份幫手出版聖嚴法師語錄,佢自認唔係虔誠佛教徒,但讀聖嚴法師嘅語錄獲益良多,每次遇到唔開心,就攞出嚟重溫,自我慰解一番。今次大輝通訊送聖嚴法師語錄,相信係既為神功,亦為弟子,藉此悼念今年二月初去世嘅師傅,亦可以教化世道。

聖嚴法師嘅「心六倫」語錄,教人處理家庭、生活、校園、職場、族群,以及人同大自然嘅倫理關係,喺大輝份通訊入面,有篇訪問廠商會永遠名譽會長陳永棋嘅文章,標題係「識己識人識進退」,棋哥喺入邊勸喻大家畀機會年輕人,識得退位讓賢。大輝用嚟點題嘅嗰句話,正係「心六倫」聖嚴法師嘅真言,唔知佢講畀邊個聽呢?