本文重點
早幾日先講過,最近因豬流感(H1N1甲型流感)而人氣急升嘅食物及衞生局副局長梁卓偉,畀部分議員質疑佢獨沽一味淨係搞醫療,對局內其他政策範圍非常生手,好似喺早前鯉魚門抽海水事件,佢只係睇水辦含菌量、唔理啲商舖死活嘅態度,已經辣㷫班議員,點知近日又出事,由佢負責嘅三億元抗疫衞生撥款,出乎意料咁面臨觸礁危機,又衰多鑊。
最近唔少國家都開始將豬流感當做一般傷風感冒嚟處理,但我哋嘅特區政府就繼續後知後覺、反應遲鈍,照舊當豬流感係世紀疫症咁對抗,上個禮拜豪花七億元公帑購買大堆成效存疑嘅豬流感疫苗,原定今日會再向立法會財委會申請三億元撥款,畀食環署同康文署等七個部門推行抗疫衞生措施。
本來有關撥款既能改善環境衞生,又可以增加就業,政府點諗都唔會預到有議員會唔支持,然而梁卓偉早前向立法會衞生事務委員會講解撥款申請時,畀嚟自唔同黨派嘅議員炮轟撥款文件內容粗疏,可以創造到幾多個就業機會、每個職位有幾高人工、幾時可以清除晒各區嘅衞生黑點等,全部冇數據、冇詳情,有借抗疫為名趁火打劫之嫌;部分議員更點名批評梁卓偉態度囂張,好似以為自己搞抗疫就大晒咁樣。
問責制大倒退
最後泛民主派、富貴黨同工聯會都對部分文件內容同梁卓偉嘅解釋好有意見,令撥款有機會遭否決,食衞局被迫將撥款申請押後到下禮拜五表決,希望可以喺多出嚟嘅一個禮拜向議員提供更多補充資料,游說佢哋回心轉意。
由於梁卓偉本身已辣㷫咗唔少議員,食衞局因此要時光倒流番去未有副局長同政治助理嘅時代,派番啲本應係政治中立嘅公務員同事,去做政治游說同補鑊工作,簡直係一大諷刺,亦再次證明成個問責制根本就係浪費公帑、愈搞愈弊!
