支持環保係人都舉起雙手贊成，試問有邊個唔想空氣清新啲、個天藍啲吖？減少使用膠袋本來就係好事，但政府獨沽一味淨係識收錢，啲錢收番嚟點用又唔講，宣傳唔足夠，配套措施又唔完善，利民咪變咗擾民囉。

環境局局長邱騰華尋日去太古城巡視「備戰」情況，佢話新措施目的係環保，實施之後，會派人去各區巡查，但唔會放太多人力物力。定咗措施又闊佬懶理，即係想點先？太一叮諗極都唔明，為咗環保收膠袋稅，好應該專款專用，但政府冇你咁好氣，全數收晒入庫房，冇撥款搞環保。市民畀錢嗰陣，條氣已經唔多順啦，依家錢就識收，嘢就唔想做，政府到底想搞環保定係想掠水㗎？

叮！政府冇啲誠意，市民無所適從，唔怪得有商戶為逃避徵費出盡怪招啦。呢嗱，為咗唔影響生意，有啲用紙袋代替膠袋，有啲就改派用料比膠袋多十幾倍嘅「不織布袋」，呢兩樣「替代品」對環境嘅傷害仲大過齋用膠袋。有啲仲醒，索性利用法例漏洞，用冇手挽嘅「變種膠袋」代替，只要可以令顧客免除「帶袋」煩惱，乜都諗得出。

查實，唔係話商戶超醒，係官員超懶啫。呢啲手法，政府應該一早預咗啦。淨係收錢唔做嘢，可能危害仲大。嗱，愛爾蘭實施膠袋稅之後，表面上購物膠袋使用量少咗九成，但同期紙袋用量大增，膠垃圾袋銷量更加飆升咗十倍。仲有，本港唔少商戶都話政府宣傳唔足夠，到時候容易引起無謂爭拗。而且，對於貧困家庭尤其係長者，五毫子慳多幾次已經夠一餐，向佢哋徵稅同間接剝削有乜分別？

叮！政府搞環保不過係做騷，早幾日環境局至畀人踢爆，為咗宣傳減排「成果」，採用連歐美先進國家都唔敢用嘅最高標準，嚟規定修補漆料揮發性有機化合物排放嘅含量，汽車維修業生意難做，過萬從業員隨時飯碗不保。為求做騷效果罔顧業界生死，簡直係靠害！

之但係，政府自己做嘢嘅標準就低到離晒譜。環保署量度空氣污染指數嘅「空氣質素指標」，原來用咗二十年都冇修訂過。當局話要採用世衞組織嘅嚴格標準，但係又建議採用門檻最低、發展中國家至用嗰套，仲低過本港原有標準，直頭係國際笑話。唔怪得有環保組織人士前日喺中環政府總部外牆掛咗幅「氣候逃犯」通緝令，抗議港府漠視氣候變化問題啦。

講開真係笑甩人棚牙，環保居然仲係政府吹到天花龍鳳嗰「六大優勢產業」之一。收五毫子膠袋稅、換幾萬隻慳電膽、玩吓「停車熄匙」就當正自己係「環保先鋒」，發夢都冇咁早啦？叮！